संपादक फिरोज खाटीक :- 9284524906
* पुणे पोलीस टाईम्स ऑनलाईन पुणे शहर *
पुणे : पुण्यातील भवानी पेठ परिसरातील काशेवाडी भागात रविवारी संध्याकाळी घडलेल्या घटनेने नागरिकांमध्ये दहशतीचे वातावरण निर्माण झाले आहे. चार जणांच्या अल्पवयीन टोळक्याने मेडिकल दुकानात घुसून कोयत्याने आणि धारदार शस्त्रांनी उधळण केली. अचानक झालेल्या या हल्ल्यात दुकानातील सीसीटीव्ही कॅमेरे आणि काचेचे काउंटर फोडण्यात आले, तसेच दुकानातील मालाचे मोठे नुकसान झाले आहे. पोलिसांकडून मिळालेल्या माहितीनुसार, ही घटना संध्याकाळी पाचच्या सुमारास घडली. मेडिकल दुकानासमोर काही तरुणांनी आपली दुचाकी लावली होती. जागा कमी असल्याने दुकानासमोर अडथळा निर्माण झाला. यामुळे दुकानदाराने त्यांना दुचाकी बाजूला लावण्यास सांगितले. यावरून किरकोळ वाद झाला. त्या वेळी काही न सांगता निघून गेलेल्या तरुणांनी हा राग मनात ठेवला. वादानंतर काही वेळातच चार अल्पवयीन पुन्हा दुकानात परतले. त्यांच्या हातात कोयते आणि धारदार शस्त्रे होती. दुकानात शिरताच त्यांनी प्रथम सीसीटीव्ही कॅमेऱ्यांवर तुटून पडत त्यांची तोडफोड केली. त्यानंतर त्यांनी काउंटरवरील काचेवर धारदार शस्त्रांनी वार करून तो फोडला. या धुमाकुळात दुकानातील औषधांचे साहित्य, बॉटल्स व इतर वस्तूंचे नुकसान झाले. अचानक झालेल्या या हल्ल्याने दुकानदार व ग्राहक घाबरून गेले. घटनेनंतर आरोपी पळून गेले असून पोलिसांनी तत्काळ परिसरात गस्त वाढवली आहे. या प्रकरणातील सर्व आरोपी अल्पवयीन असल्याची माहिती समोर आली आहे. त्यांचा शोध घेण्यासाठी पोलीस पथके रवाना करण्यात आली असून गुन्हा नोंदविण्यात आला आहे.
मुख्य संपादक : – इमरान शेख
